കെവിന്‍ വധക്കേസില്‍ ആരോപണം നേരിടുന്ന എസ്‍ഐ ഷിബുവിനെ സര്‍വ്വീസില്‍ തിരിച്ചെടുത്തത് അറിഞ്ഞില്ലെന്ന് ഡിജിപി

കെവിന്‍ വധക്കേസില്‍ ആരോപണം നേരിടുന്ന എസ്‍ഐ ഷിബുവിനെ സര്‍വ്വീസില്‍

തിരുവനന്തപുരം: കോട്ടയത്തെ കെവിന്‍ വധക്കേസില്‍ ആരോപണം നേരിടുന്ന ഗാന്ധിനഗര്‍ എസ്‍ഐ ഷിബുവിനെ സര്‍വ്വീസില്‍ തിരിച്ചെടുത്തത് അറിഞ്ഞില്ലെന്ന് കേരള പോലീസ് ഡിജിപി ലോക് നാഥ് ബെഹ്‍റ. മാധ്യമങ്ങളിലൂടെയാണ് വിവരം അറിഞ്ഞതെന്നും എസ്‍പിയോട് ചോദിച്ചശേഷം പ്രതികരിക്കുമെന്നും ഡിജിപി മാധ്യമങ്ങളോട് പറഞ്ഞു.

കെവിനെ തട്ടിക്കൊണ്ടുപോയ സംഭവം ഷിബു അറിഞ്ഞുകൊണ്ടാണെന്ന് ആരോപണം ഉണ്ടായിരുന്നു. തട്ടിക്കൊണ്ടുപോകുംവഴി കേസിലെ മുഖ്യപ്രതിയായ ഷാനു ചാക്കോയും എസ്ഐ ഷിബുവും തമ്മിൽ സംസാരിച്ചിരുന്നതായി കെവിനോടൊപ്പം തട്ടിക്കൊണ്ടുപോകപ്പെട്ട അനീഷ് വെളിപ്പെടുത്തിയിരുന്നു. ഷിബു ഷാനുവിനെ വിളിച്ചിരുന്നതായും എസ്ഐക്ക് 10,000 രൂപ നൽകിയിട്ടുണ്ടെന്ന് ഷാനു പറഞ്ഞതായും അനീഷ് പറഞ്ഞിരുന്നു.

ഇതേ തുടര്‍ന്ന് എസ്‍.ഐ ഷിബുവിനെ സര്‍വ്വീസില്‍ നിന്ന് പുറത്താക്കിയിരുന്നു. ഔദ്യോഗിക കൃത്യവിലോപത്തെത്തുടർന്ന് വിശദീകരണം ആവശ്യപ്പെട്ട് ഷിബുവിന് നോട്ടീസ് നൽകിയിരുന്നു. ഇതിൽ വിശദീകരണം കേട്ടശേഷമാണ് തിരിച്ചെടുക്കാൻ തീരുമാനിച്ചത്.

ഷിബുവിനെ തിരിച്ചെടുക്കാനുള്ള നീക്കത്തിന് എതിരെ കെവിന്‍റെ കുടുംബം പരാതി നല്‍കാന്‍ തീരുമാനിച്ചിട്ടുണ്ട്. മുഖ്യമന്ത്രിക്കും ഡിജിപിക്കും പരാതി നല്‍കാനാണ് തീരുമാനം.

Back to top button