അന്തദേശീയം (International)

ആണവപരീക്ഷണം നിര്‍ത്തി: ഡോണള്‍ഡ് ട്രംപ് ഉത്തരകൊറിയയെ വിറപ്പിച്ചോ?

ആണവപരീക്ഷണം നിര്‍ത്തി

വാഷിങ്ടൺ: തങ്ങളുടെ എല്ലാ ആണവപരീക്ഷണങ്ങളും മിസൈൽ പരീക്ഷണങ്ങളും നിര്‍ത്തി വെക്കുന്നതായി ശനിയാഴ്ച ഉത്തര കൊറിയ അറിയിച്ചതോടെ അമേരിക്കയുടെ വിദേശകാര്യനയത്തിന്‍റെ ചരിത്രത്തിൽ ഇടം നേടിയിരിക്കുകയാണ് അമേരിക്കൻ പ്രസിഡന്‍റ് ഡോണള്‍ഡ് ട്രംപ്. പരീക്ഷണങ്ങള്‍ നിര്‍ത്തുന്നതോടൊപ്പം സ്ഥിരമായി ആണവപരീക്ഷണം നടത്തുന്ന കേന്ദ്രം അടച്ചു പൂട്ടുന്നതായും ഉത്തര കൊറിയ പ്രഖ്യാപിച്ചു. രാജ്യത്തിന്‍റെ സമ്പദ്‍‍വ്യവസ്ഥ പുനര്‍നിര്‍മിക്കുന്നതിനാണ് ശ്രദ്ധയെന്നാണ് ഉത്തരകൊറിയ പത്രക്കുറിപ്പിൽ അറിയിച്ചത്.

അതേസമയം, യുഎസിന്‍റെ ആവശ്യപ്രകാരം ആണവപരീക്ഷണങ്ങള്‍ പൂര്‍ണമായും നിര്‍ത്തിവെച്ചതായുള്ള ഉറപ്പൊന്നും നല്‍കിയിട്ടില്ലെങ്കിലും തങ്ങളുടെ ദൗത്യം പകുതി വിജയിച്ച സന്തോഷത്തിലാണ് യുഎസ് ഭരണകൂടം.

യുഎസ് പ്രസിഡന്‍റ് ഡോണള്‍ഡ് ട്രംപുമായുള്ള കൂടിക്കാഴ്ചയ്ക്ക് മുന്നോടിയായുള്ള ഉത്തരകൊറിയയുടെ ഈ നീക്കത്തെ ചെറുതായി കാണേണ്ടതില്ലെന്നാണ് പ്രദേശത്തെ നയതന്ത്രജ്ഞരുടെ വാദം. വാഷിങ്ടൺ ആവശ്യപ്പെട്ട എല്ലാ കാര്യങ്ങളും ഉത്തര കൊറിയ അംഗീകരിച്ചില്ലെങ്കിലും ഒരു സംഭാഷണത്തിന് തുടക്കമിടാൻ നിലവിലെ സാഹചര്യം ഉപകരിച്ചേക്കുമെന്നാണ് ഇവരുടെ വിലയിരുത്തൽ. ആണവപദ്ധതികളിൽ നിന്നുള്ള പൂര്‍ണ്ണമായ പിന്മാറ്റമാണ് യുഎസ് ഉത്തരകൊറിയയിൽ നിന്ന് ആവശ്യപ്പെടുന്നത്.

അതായത് കിം ജോങ് ഉൻ പൂര്‍ണമായും നിബന്ധനകള്‍ അംഗീകരിച്ചിട്ടില്ല എന്നതിനര്‍ത്ഥം ട്രംപും കൂടിക്കാഴ്ച സംബന്ധിച്ച് പൂര്‍ണ്ണമായി മനസ്സറിയിച്ചിട്ടില്ല എന്നതു തന്നെയാണ്. എന്നാൽ ഉത്തര കൊറിയയുടെ പ്രസ്താവനയോടു കൂടി സൃഷ്ടിക്കപ്പെട്ടിരിക്കുന്ന ഈ പുതിയ സാഹചര്യത്തിൽ നിന്ന് ഒളിച്ചോടാൻ യുഎസിനും എളുപ്പമല്ല.

അതേസമയം, ഉത്തര കൊറിയയുടെ ഇപ്പോഴത്തെ നിലപാടിനെ വാജ്പേയിയുടെ കാലത്തെ ഇന്ത്യയുടെ നിലപാടുമായി താരതമ്യം ചെയ്യുന്നവരുമുണ്ട്. രാജ്യത്ത് ആണവപരീക്ഷണങ്ങള്‍ ഇനി വേണ്ടെന്നു പ്രഖ്യാപിച്ച പ്രധാനമന്ത്രി എ ബി വാജ്പേയി രാജ്യം ആണവശേഷി തെളിയിച്ചു കഴിഞ്ഞെന്നും ഇനിയുള്ള പരീക്ഷണങ്ങള്‍ ലാബിൽ നടത്തിയാൽ മതിയെന്നുമായിരുന്നു അഭിപ്രായപ്പെട്ടത്. സമാനമായി, ഭൂഖണ്ഡാന്തര ബാലിസ്റ്റിക് മിസൈൽ പരീക്ഷണങ്ങളുടെയും ആണവ പരീക്ഷണങ്ങളുടെയും ആവശ്യമില്ലെന്നും അതുകൊണ്ടാണ് രാജ്യത്തെ ആണവ പരീക്ഷണകേന്ദ്രം അടച്ചിടുന്നതെന്നുമായിരുന്നു കിം ജോങ് ഉന്നിനെ ഉദ്ധരിച്ച് ദേശീയ വാര്‍ത്താ ഏജൻസി അറിയിച്ചത്.

സിഐഎയുടെ ഡയറക്ടറും സ്റ്റേറ്റ് സെക്രട്ടറി നോമിനിയുമായ മൈക്ക് പോംപിയോ ഉത്തര കൊറിയൻ തലസ്ഥാനത്തേയ്ക്ക് രഹസ്യമായി എത്തി കിം ജോങ് ഉന്നുമായി സംസാരിച്ചതായി ട്രംപ് വെളിപ്പെടുത്തി മണിക്കൂറുകള്‍ക്കകമാണ് കിമ്മിന്‍റെ പ്രസ്താവന. ട്രംപിന് ബുദ്ധിമാന്ദ്യമാണെന്നുള്‍പ്പെടെ പ്രകോപനപരമായ പല പ്രസ്താവനകളും പുറപ്പെടുവിച്ച് മാസങ്ങള്‍ക്കകം ഇത്തരത്തിൽ നിലപാട് മാറ്റാനുള്ള കാരണമെന്താണെന്ന് അന്വേഷിക്കുന്നവര്‍ക്ക് പല ഉത്തരങ്ങളാണ് ലഭിക്കുക. ഉത്തര കൊറിയയുടെ സാമ്പത്തികഞെരുക്കം മുതൽ രാജ്യത്ത് സുസ്ഥിരമായ നയതന്ത്രബന്ധത്തിന്‍റെ ആവശ്യകത വരെ ചൂണ്ടിക്കാണിക്കപ്പെടുന്നുണ്ട്.

Summary
Review Date
Author Rating
51star1star1star1star1star
Tags
advt

മറുപടി രേഖപ്പെടുത്തുക

താങ്കളുടെ ഇമെയില്‍ വിലാസം പ്രസിദ്ധപ്പെടുത്തുകയില്ല. അവശ്യമായ ഫീല്‍ഡുകള്‍ * ആയി രേഖപ്പെടുത്തിയിരിക്കുന്നു

This site uses Akismet to reduce spam. Learn how your comment data is processed.