സ്പോട്സ് (Sports)

പാവങ്ങളായതിനാലാണോ ഒഴിവാക്കിയതെന്ന് ചിത്രയുടെ അച്ഛൻ !

പാലക്കാട്- ‘പാവങ്ങളായതിനാലാണോ ഞങ്ങളുടെ മോളെ ഒഴിവാക്കിയത്’- പി.യു ചിത്രയുടെ അച്ഛന്‍ ഉണ്ണിക്കൃഷ്ണൻ നിറഞ്ഞ കണ്ണുകളോടെ ചോദിക്കുന്നതിതാണ്.

ഞങ്ങള്‍ പാവപ്പെട്ടവരാണ്. കൂലിപ്പണിക്കാരാണ്. അതുകൊണ്ടാവാം ഒരു പക്ഷേ മോളെ തഴഞ്ഞത്. സങ്കടമുണ്ട്. പക്ഷേ ആരോടുപറയാന്‍.

ലോക അത്‌ലറ്റിക്‌ ചാമ്പ്യന്‍ഷിപ്പിനുള്ള ഇന്ത്യന്‍ടീമില്‍നിന്ന് പി.യു. ചിത്രയെ ഒഴിവാക്കിയതറിഞ്ഞപ്പോള്‍ ഞാനും അവളുടെ അമ്മ വസന്തകുമാരിയും കരഞ്ഞു. രാവിലെ മോള്‍ വിളിച്ചിരുന്നു. അവള്‍ക്ക് സങ്കടമുണ്ട്. കരയേണ്ടന്ന്‌ പറഞ്ഞ് ആശ്വസിപ്പിച്ചു., അദ്ദേഹ പറഞ്ഞു.

‘കഴിവില്ലാത്തതിനാലാണെങ്കില്‍ അതുപറയാം. ഇന്ത്യയ്ക്ക് സ്വര്‍ണം വാങ്ങിക്കൊടുത്തതല്ലേ… അതെന്താ ആരും ഓര്‍ക്കാത്തത്…’അച്ഛൻ ചോദിക്കുന്നതിതാണ്.

തലപ്പൊറ്റയിലെ ഒരു വീടിന്റെ കെട്ടുപണിയിലായിരുന്നു ഇരുവരും. ‘പണിക്കുപോയില്ലെങ്കില്‍ വീട് പട്ടിണിയിലാകും.

എല്ലാത്തരം കൂലിപ്പണിയും ചെയ്യും. രാവിലെ നാലുമണിക്ക് എണീറ്റ് മോള്‍ക്ക് ഭക്ഷണമുണ്ടാക്കി ആറുമണിയാകുമ്പോഴേക്ക് സ്കൂളിലേക്ക് വിടും. സ്‌കൂള്‍മൈതാനത്ത് ഓടാന്‍പോകുന്ന കുട്ടി അതുവഴി കോളേജിലുംപോയി വൈകീട്ടാണ് മടങ്ങിയെത്തുക.

കഷ്ടപ്പെട്ട് വളര്‍ത്തിയതാ. അവള്‍ ലോകമീറ്റില്‍ മെഡല്‍ നേടുമെന്ന് സ്വപ്നംകണ്ടതാണ് ഈ നാട്ടുകാര്‍. ആര്‍ക്കുവേണ്ടിയാ അവളെ ഒഴിവാക്കിയത്?’ ആ മാതാപിതാക്കൾ വിതുമ്പിക്കൊണ്ടാണ് ഇതുപറഞ്ഞത്. ചിത്ര നൽകിയ പരാതിയിൽ ഹൈക്കോടതി വിധി ഇന്ന് വരാനിരിക്കുകയാണ്.

Tags
Back to top button