പാക്കിസ്ഥാൻ അപമാനിച്ചെന്ന പരാതിയുമായി സരബ്‍‍ജീതിന്‍റെ കുടുംബവും.

ചണ്ഡീഗഢ്: പാക്കിസ്ഥാനിൽ തടവിൽ കഴിയുന്ന കുൽഭൂഷൺ ജാദവിന്‍റെ കുടുംബം പാക്കിസ്ഥാൻ ഉദ്യോഗസ്ഥരാൽ അപമാനിക്കപ്പെട്ടതിനു പിന്നാലെ സമാനമായ സാഹചര്യത്തിൽ അപമാനിക്കപ്പെട്ടിരുന്നുവെന്ന പരാതിയുമായി പാക്ക് ജയിലിൽ മരണപ്പെട്ട സരബ്‍‍ജീത് സിങിന്‍റെ കുടുംബവും. സരബ്‍‍ജീതിനെ സന്ദര്‍ശിക്കാനായി പാക്കിസ്ഥാനിലെത്തിയപ്പോള്‍ കുൽഭൂഷൺ ജാദവിന്‍റെ കുടുംബം നേരിട്ടതിനു സമാനമായ അപമാനമാണ് തങ്ങളും നേരിട്ടതെന്ന് സരബ്‍‍ജീതിന്‍റെ സഹോദരി ദൽബീര്‍ കൗര്‍ പറഞ്ഞു.

സരബ്‍‍ജീതിന്‍റെ ഭാര്യയുടെ നെറ്റിയിലെ സിന്ദൂരം പാക്കിസ്ഥാൻ ഉദ്യോഗസ്ഥര്‍ നിര്‍ബന്ധിച്ച് മായ്ച്ചു കളഞ്ഞു. സരബ്‍‍ജീതിനെ കാണാനെത്തിയപ്പോള്‍ വളരെ മോശമായിരുന്നു പാക്ക് ഉദ്യോഗസ്ഥരുടെ പെരുമാറ്റം. തലയിലെ ഹെയര്‍പിന്നുകളും പെണ്‍മക്കളുടെ കയ്യിലുണ്ടായിരുന്ന ആഭരണങ്ങളും ഊരി വാങ്ങിച്ചെന്നും കുടുംബം അറിയിച്ചു.

പാക്കിസ്ഥാനിലെത്തുന്നതിന് മുമ്പ് എന്താണ് അവിടെ നടക്കുകയെന്നതിനെക്കുറിച്ച് യാതൊരു സൂചനയും ഉണ്ടായിരുന്നില്ല. 18 വർഷങ്ങൾക്കു ശേഷമായിരുന്നു ഭാര്യ സുക്പ്രീത് കൗറും രണ്ടു പെൺമക്കളും സഹോദരി ദൽബീർ കൗറും പാക്കിസ്ഥാനിലെത്തി സരബ്‍‍ജീതിനെ സന്ദര്‍ശിച്ചത്.

ലാഹോര്‍ ഗുരുദ്വാരയിൽ പാസ്പോര്‍ട്ട് സമര്‍പ്പിച്ചിരുന്നെങ്കിലും പാസ്പോര്‍ട്ട് കാണാനില്ലെന്ന് പറഞ്ഞ് ഉദ്യോഗസ്ഥര്‍ മടക്കയാത്ര വൈകിപ്പിച്ചതായും അവര്‍ വ്യക്തമാക്കി. 2011ൽ സരബ്‍‍ജീതിനെ സന്ദര്‍ശിക്കാനായി പാക്കിസ്ഥാനിലെത്തിയപ്പോഴും സമാനമായ അവസ്ഥയായിരുന്നു നേരിട്ടതെന്നും ദൽബീര്‍ കൗര്‍ പറഞ്ഞു. നിരപരാധിത്വം തെളിയിക്കാൻ സഹായിക്കണമെന്ന് കരഞ്ഞുകൊണ്ട് അദ്ദേഹം ആവശ്യപ്പെട്ടെന്നും അവര്‍ പറഞ്ഞു.

1991ൽ ചാരവൃത്തി ആരോപിച്ച് പാക്ക് കോടതി വധശിക്ഷ വിധിച്ച സരബ്‍‍ജീതിന്‍റെ ശിക്ഷ നടപ്പാക്കുന്നത് ഏറെ വര്‍ഷത്തേയ്ക്ക് നീട്ടി വെക്കുകയായിരുന്നു. 2013ലാണ് സരബ്ജീതിന് പാക്കിസ്ഥാൻ ജയിലിൽ വച്ച് ക്രൂരമര്‍ദ്ദനമേൽക്കുകയും കുറച്ച് ദിവസങ്ങള്‍ക്കു ശേഷം മരണപ്പെടുകയും ചെയ്തത്.

advt
Back to top button